વારસો

દીકરા,
મારી પાસે તને આપવા
ખેતર નથી,
બંગલો નથી,
બૅન્કમાં ફિક્સ ડિપોઝિટ પણ નથી.

મારી પાસે છે
એક લાકડાનો કબાટ,
જેમાં
મેઘાણી છે, કલાપી છે,
ઉમાશંકર છે,
ને બે-ચાર એવાં પુસ્તકો
જેનાં પાનાં વચ્ચે
મેં સુકાયેલાં ફૂલ મૂક્યાં છે.

વકીલ કહેશે:
‘આની કોઈ કિંમત નથી.’

પણ દીકરા,
કોઈ રાતે તું એકલો પડે,
ને આખું જગત
તારી સામે ખોટું બોલતું લાગે,
ત્યારે આ કબાટ ખોલજે.

અંદરથી
તારો બાપ નહીં,
આખી એક પરંપરા
તારો હાથ પકડશે.

– પરાગ રતનપરા