મેઘધનુષનો લસરપટ્ટો

વરસાદ રહી ગયો
ને આભમાં ઊગ્યું મેઘધનુષ.

દીકરી કહે:
‘પપ્પા, મારે એના પર લસરવું છે —
જાંબલીથી ચડું ને લાલ પર ઊતરું.’

મેં કહ્યું: ‘એ તો બહુ દૂર છે, બેટા,
એને પકડી ન શકાય.’

એ હસી,
ને આંગણાના ખાબોચિયામાં
ધબ્બ કરતીક કૂદી પડી.

પાણીમાં હલબલી ઊઠ્યું
આખું મેઘધનુષ —
ને એના ફ્રૉક પર
સાતેય રંગના છાંટા.

હું વર્ષોથી આકાશ તાકતો રહ્યો;
એણે એક જ કૂદકે
આકાશને
નીચે બોલાવી લીધું.

– પરાગ રતનપરા