ધરતીકંપ પછીનું શહેર

છવ્વીસમી જાન્યુઆરીની સવારે
શાળાનાં બાળકો
ધ્વજવંદન માટે
હાથમાં તિરંગો લઈ
કતારમાં ઊભાં હતાં.

પછી ધરતીએ
એક પડખું ફેરવ્યું.

ઘડિયાળો ત્યાં જ અટકી ગઈ —
આઠ ને છેતાલીસ.

આજે એ શહેર
ફરી ઊભું થયું છે:
પહોળા રસ્તા,
નવાં મકાનો,
ચમકતા મૉલ.

પણ જૂની શેરીના ખૂણે
એક ઘરડી સ્ત્રી
રોજ સવારે
કાટમાળમાંથી મળેલું
એક નાનું દફતર લઈને
ઝાંપે ઊભી રહે છે,

જાણે હમણાં જ
રિસેસનો ઘંટ વાગશે.

– પરાગ રતનપરા