દવા અને દુઆ

હૉસ્પિટલની લૉબીમાં
બે બાંકડા છે.

એક પર બેઠા છે
બિલ ભરવા પૈસા ગણતા
દીકરા.

બીજા પર બેઠી છે
માળા ફેરવતી
મા.

દીકરાઓ ડૉક્ટરને પૂછે છે:
‘કેટલા દિવસ?’
‘કેટલો ખર્ચ?’

મા
ભગવાનને પૂછે છે:
‘મારા દિવસ લઈ લે,
એના આપી દે.’

ત્રીજે દિવસે
ડૉક્ટર બહાર આવ્યા
ને કહ્યું:
‘ચમત્કાર થયો.’

દીકરાઓએ
દવાની કંપનીનું નામ પૂછ્યું.

માએ
કોઈને કશું ન પૂછ્યું —
ચૂપચાપ
માળાનો છેલ્લો મણકો
આંખે અડાડ્યો.

– પરાગ રતનપરા