વર્ક ફ્રૉમ હોમનું ગીત

ઑફિસ ઘરમાં આવી રે ભાઈ, ઑફિસ ઘરમાં આવી,
કૅમેરે તો ટાઈ ને કોલર, નીચે લુંગી લાવી!

સવારે મીટિંગ, બપોરે મીટિંગ, સાંજે મીટિંગ ચાલે,
બા પૂછે: ‘તું કામ કરે છે કે બસ ફોને મ્હાલે?’
‘મ્યૂટ’ દબાવી ખાઉં ભજિયાં, ‘અનમ્યૂટ’ કરી ખાંસું,
બૉસ કહે: ‘શું નેટ ગયું?’ ને હું કહું: ‘હા, સાચું!’
ઑફિસ ઘરમાં આવી…

ચાર બાય ચારના ખૂણામાંથી આખી દુનિયા બોલે,
પાછળ કપડાં સુકાય દોરીએ, છોકરું ‘પપ્પા’ બોલે;
કૂકર સીટી મારે ત્યાં તો ક્લાયન્ટ ચોંકી જાય,
‘સર, એ તો નવું અપડેટ છે!’ — એમ કહી સમજાય.
ઑફિસ ઘરમાં આવી…

પરાગ કહે: આ ઘર પણ ઑફિસ, ઑફિસ પણ હવે ઘર,
રવિવાર ને સોમવારનો ભેદ થયો સરભર;
નોકરી ઘરમાં ઘૂસી ગઈ ને ઘર ક્યાં ગયું ખોવાઈ?
લૅપટૉપ બંધ કરું તોયે મગજ ચાલુ, ભાઈ!
ઑફિસ ઘરમાં આવી…

– પરાગ રતનપરા