વાવતાં

આંખમાં વર્ષ ગ્યાં આ સપન વાવતાં,
ગામ છૂટ્યું, નવું આ વતન વાવતાં.

બીજ રોપ્યાં, ઉગાડ્યાં, ઉછેર્યાં ઘણાં,
કેટલા ઘાવ ખાધા ચમન વાવતાં.

પાંખ દીધી અમે બાળને, ને પછી
નીડ સૂનો થયો આ ગગન વાવતાં.

ફૂલ ખીલ્યાં હવે આજ આંગણ ભરી,
માવડી ઓગળી એ જતન વાવતાં.

આ પરાગે ગઝલ ફૂલમાં સંઘરી,
મ્હેક ઊડી, ભળી એ પવન વાવતાં.

– પરાગ રતનપરા

#ગઝલ #સપનું #ત્યાગ #મા #સંતાન #પરાગરતનપરા
#GujaratiGhazal #Dreams #Sacrifice #Parenthood #EmptyNest #ParagRatanpara