મારી ગુજરાત

ગરવી ગાજે ગિરનારે ને સાગર ગાજે સોમનાથ,
એવી મારી ગુજરાતની ધરતી, જ્યાં હૈયે હૈયે હાથ.

ખેતરમાં લહેરાતો કપાસ ને ગરબે ઘૂમતી નાર,
વેપારીની ચતુરાઈ ને ખેડૂતનો પરસેવો ધાર;
ગાંધીના ચરખાએ કાંત્યો આખા દેશનો સાથ…
એવી મારી ગુજરાત…

નરસૈંયાનાં પ્રભાતિયાં ને મીરાંની કરતાલ,
કચ્છના રણમાં ચાંદની ઢળે, ગીરમાં સાવજની ચાલ;
ખાખરા, ઢોકળાં, ફાફડા-જલેબીની રવિવારી વાત…
એવી મારી ગુજરાત…

પરાગ કહે: દરિયાપાર જઈ ગુજરાતી જ્યાં વસે,
ત્યાં ત્યાં નાનું ગુજરાત ઊભું થાય ને હરખે હસે;
માની ભાષા બોલતાં રહેજો, એ જ સાચી સોગાત…
એવી મારી ગુજરાત…

– પરાગ રતનપરા