તું, સખી

આંસુ લૂછી, શસ્ત્ર ઝાલી, આજ દુર્ગા તું, સખી,
પાપ ધોતી, પ્યાસ હરતી, નિત્ય ગંગા તું, સખી.

આગમાં તપતી રહી, વનવાસ વેઠ્યો તોય પણ
ના નમી જે, એ જ ધરતીજાઈ સીતા તું, સખી.

ઝેર પીધું, તોય ગાતી, લોકલાજો ના ગણી,
એકતારો હાથ, ઝૂમે એ જ મીરાં તું, સખી.

આંગણું ને આભ બંને સાચવીને ચાલતી,
કાલની પણ, આજની પણ, એક ગાથા તું, સખી.

આ પરાગે શબ્દ-પુષ્પો પાય પાસે સૌ ધરી,
‘પ્રેરણા તું, પ્રાણ તું, ને એ જ શ્રદ્ધા તું, સખી.’

– પરાગ રતનપરા

#ગઝલ #નારીશક્તિ #સ્ત્રી #દુર્ગા #સન્માન #પરાગરતનપરા
#GujaratiGhazal #WomanPower #Shakti #Respect #Empowerment #ParagRatanpara