તને

કહે તો નદી થઈ ઝુલાવું તને,
કહે તો પવન થઈ હસાવું તને.

ન સોનું, ન ચાંદી, ન હીરા કને,
છતાં ફૂલ ગૂંથી સજાવું તને.

રિસાજે ભલે તું ઘડી બે ઘડી,
પછી ગીત ગાતો મનાવું તને.

ન એલાર્મ વાગે સવારે કદી,
કરી કલરવો હું જગાવું તને.

પરાગે ભરી મ્હેક આખા ગગન,
હવે ચાંદ-તારા બતાવું તને.

– પરાગ રતનપરા

#ગઝલ #પ્રેમ #પ્રિયતમા #લાડ #રોમાંસ #પરાગરતનપરા
#GujaratiGhazal #LoveSongs #Beloved #Tenderness #Romance #ParagRatanpara