સ્ક્રીનમાં

એક છત નીચે રહે, પણ સૌ બધા છે સ્ક્રીનમાં,
ઓરડે દીવો નથી, ને હર દુઆ છે સ્ક્રીનમાં.

થાળમાં ઠરતી રહી માએ ધરેલી રોટલી,
‘લાઇકો’માં સ્વાદ છે, ને સૌ મજા છે સ્ક્રીનમાં.

આગ લાગી બાજુમાં ને કોઈ ત્યાં દોડ્યું નહીં,
ફોન લઈને લોક ઊભા, ને સભા છે સ્ક્રીનમાં.

બાગમાં ખીલ્યા ગુલાબો, કોઈ ના જોવા ગયું,
વૉલપેપરમાં વસંતી આ હવા છે સ્ક્રીનમાં.

ફૂલ તો આવી ગયું, પણ મ્હેક ક્યાં આવી, ‘પરાગ’?
સ્પર્શ વિણ, શ્વાસો વિના, કેવી અદા છે સ્ક્રીનમાં!

– પરાગ રતનપરા

#ગઝલ #વ્યંગ #મોબાઇલ #સોશિયલમીડિયા #એકલતા #પરાગરતનપરા
#GujaratiGhazal #Satire #ScreenAddiction #SocialMedia #DigitalLoneliness #ParagRatanpara