સપનું ચાખી જો

સપનું ચાખી જો, રે મનવા, સપનું ચાખી જો,
ખારું, ખાટું, મીઠું, તીખું — થોડું રાખી જો.

બાળપણે તો સપનું હતું ગોળની ગાંગડી જેવું,
મેળો, ચકડોળ, પતંગ, ને મા-ખોળો — બસ એવું;
મોટા થઈને સપને ચડી ગયો સ્વાદ નોકરીનો ફીકો…
સપનું ચાખી જો…

જુવાનીમાં સપનું આવ્યું મોગરાની મ્હેક જેવું,
કોઈની આંખ, કોઈનું હસવું, કોઈ હૈયાનું લેવું-દેવું;
ઘડપણમાં એ જ સપનું થઈ ગયું ઉકાળા જેવું કડવું, તીખું…
સપનું ચાખી જો…

પરાગ કહે: આ સપનાનો સ્વાદ જીવનનો સાર,
જે ચાખે નહીં, એ જીવે તોય કોરો ને બેકાર;
આંખ મીંચીને એક કોળિયો — ભાઈ, ભરપૂર ચાખી જો…
સપનું ચાખી જો…

– પરાગ રતનપરા