સપનાં હતાં

ખોરડાં કાચાં હતાં, પણ આંખમાં સપનાં હતાં,
આભને આંબી જવાનાં પાંખમાં સપનાં હતાં.

ઝૂંપડી બાળી ગયું ટોળું, રડે બાળક બધાં,
આગ ઠારી ત્યાં ય ભીની રાખમાં સપનાં હતાં.

બાપુએ લીધી ઉધારે લૉટરીની ટિકિટ એક,
ખર્ચ દસનો, ને પછી તો લાખમાં સપનાં હતાં.

ઝાડ કાપ્યું, ને નજર ના ગઈ ઉપરની ડાળ પર,
ત્યાં ય ઈંડાં, ત્યાં ય માળો, શાખમાં સપનાં હતાં.

આ પરાગે ઘડપણે પણ ગીત લખ્યાં પ્રેમનાં,
મોતિયો આવ્યો, છતાં એ ઝાંખમાં સપનાં હતાં.

– પરાગ રતનપરા

#ગઝલ #સપનાં #ગરીબી #આશા #પર્યાવરણ #પરાગરતનપરા
#GujaratiGhazal #Dreams #Poverty #UndyingHope #Nature #ParagRatanpara