સમજ્યા

નજર એક નાખી, ઇશારો સમજ્યા,
ઢળી લટ પવનમાં, સહારો સમજ્યા.

હલાવ્યો હતો હાથ, જે અન્ય માટે,
અમારા જ માટે પુકારો સમજ્યા.

હતું નામ રેતી ઉપર કોતરેલું,
અમર પ્રેમનો એ ઉતારો સમજ્યા.

ગયાં એ, કહી ‘આવશું આ દિવાળી’,
અમે તો નસીબે સિતારો સમજ્યા.

પરાગે ભ્રમોમાં ગુજારી જવાની,
વમળને ય અંતે કિનારો સમજ્યા.

– પરાગ રતનપરા

#ગઝલ #ભ્રમ #એકતરફીપ્રેમ #પ્રતીક્ષા #પ્રેમ #પરાગરતનપરા
#GujaratiGhazal #Misunderstanding #OneSidedLove #FalseHope #Longing #ParagRatanpara