સાચ છે

બાળકો બોલે ગમે તે, બાળ-વાણી સાચ છે,
ને નદીમાં જે વહે છે, એ જ પાણી સાચ છે.

ભૂત, રાક્ષસ ને પરીઓ, ઊડતા ઘોડા ભલે,
તોય દાદીએ કહેલી એ કહાણી સાચ છે.

આંખ પર પાટો, સતત ફરતો રહે છે ઢોર એક,
છે અમારું આયખું પણ એ જ ઘાણી, સાચ છે.

મંચ પરથી વાયદાઓનો વરસ્યો મેઘ, પણ
આમ જનતાને મળી’તી માત્ર ધાણી, સાચ છે.

આ ‘પરાગે’ ફૂલ સાથે, ઝાકળો સાથે કરી,
બાગમાં સાંજે હવાની એ ઉજાણી સાચ છે.

– પરાગ રતનપરા

#ગઝલ #સત્ય #બાળપણ #રાજકારણ #પ્રકૃતિ #પરાગરતનપરા
#GujaratiGhazal #Truth #InnocentWords #PoliticalPromises #NaturesFeast #ParagRatanpara