રંગ રમે રાધા

રંગ રમે રાધા ગોરી, ને શ્યામ રમે સંગાથ,
ગોકુળમાં ગુલાલ ઊડે, ને ઊડે મનની વાત.

કેસૂડાંનો રંગ ઘોળ્યો, પિચકારી ભરી હાથ,
રાધા છુપાઈ કદંબ પાછળ, શોધે ગોકુળનાથ;
છાંટ્યો રંગ ત્યાં પાલવ ભીંજ્યો, ભીંજ્યું હૈયું સાથ…
રંગ રમે રાધા…

ગોપીઓ ગાય ફાગનાં ગીતો, ઢોલ વગાડે ગોપ,
યમુનાનાં જળ લાલ ગુલાબી, ઘાટે ઘાટે ઓપ;
શ્યામ કહે: ‘આ રંગ નથી, આ તો પ્રેમની સોગાત’…
રંગ રમે રાધા…

પરાગ કહે: આ હોળી નથી કોઈ એક દિવસનો તહેવાર,
જેના હૈયે શ્યામ રંગ ચડે, એ રંગાય જનમોજનમ પાર;
ધોઈ ધોઈને થાકી રાધા, તોય ન ઊતરે શ્યામની ભાત…
રંગ રમે રાધા…

– પરાગ રતનપરા