રાહ જોઉં છું

ઉંબર પર દીવો મૂકીને રાહ જોઉં છું, સાજન,
પગરવ પગરવ સાંભળીને મન ખોઉં છું, સાજન.

ફળિયે લીમડો ઝૂલે, એની ડાળે તારી વાતો,
કાગ બોલે ત્યાં તો હૈયે હરખ ન રહે સમાતો;
રોજ સવારે આંગણમાં સાથિયો પ્રોઉં છું, સાજન…
ઉંબર પર દીવો…

ટપાલીની સાઇકલની ઘંટડી જ્યાં ગાજે,
દોડી જાઉં ઝાંપે, પાછી વળું ઝીણી લાજે;
કોરા કાગળ જેવી આંખે રોઉં છું, સાજન…
ઉંબર પર દીવો…

પરાગ કહે: આ રાહ નથી, આ તો તપ છે ગોરી,
દીવે દીવે બળતી રહે છે પ્રીતની એક દોરી;
તું આવે ત્યાં સુધી ખુદને જોઉં છું, સાજન…
ઉંબર પર દીવો…

– પરાગ રતનપરા