પોપટવાળો જ્યોતિષી

ફૂટપાથ પર
એક જ્યોતિષી બેઠો છે,
સામે પાંજરું,
પાંજરામાં લીલો પોપટ.

પાંચ રૂપિયા આપો,
તો પોપટ બહાર આવે,
પત્તાંની હારમાંથી
એક પત્તું ચાંચમાં ઉપાડે,
ને તમારું નસીબ વંચાય:
‘ધનલાભ થશે.’
‘વિદેશયોગ છે.’
‘શત્રુ પરાસ્ત થશે.’

પછી પોપટને
બે દાણા મળે છે,
ને એ પાછો
પાંજરામાં જાય છે.

આખો દિવસ
એ બીજાનાં ભાગ્ય ઉઘાડે છે.

એક પત્તું
કદી નથી ઉપાડતો —
જેમાં લખ્યું હોય:
‘આકાશયોગ છે.’

– પરાગ રતનપરા