પીધા વગર

આંખ તારી જોઈને હું જાગતો પીધા વગર,
સૌ કહે છે મસ્ત, હું તો લાગતો પીધા વગર.

કોઈ પીતું ભૂલવાને, કોઈ પીતું યાદમાં,
હું જ મારાથી સતત બસ ભાગતો પીધા વગર.

હાથ ફેલાવ્યા નથી મેં ના કદી દરગાહમાં,
તોય મળતું, મૌનમાં જે માગતો પીધા વગર.

એક દરિયો છે છુપાયો આંખમાં સાકી તણી,
હું ય એને ડૂબકીથી તાગતો પીધા વગર.

ના ભમરની જેમ ચૂસ્યો કોઈ દી રસ, ઓ ‘પરાગ’,
તોય ભીતર સાજ મીઠો વાગતો પીધા વગર.

– પરાગ રતનપરા

#ગઝલ #સૂફી #મયકદો #સાકી #મસ્તી #પરાગરતનપરા
#GujaratiGhazal #SufiPoetry #Tavern #Saqi #DivineIntoxication #ParagRatanpara