ઊભી છે

પિતાના નામની તખતી ખમીને ઘાત ઊભી છે,
તિરાડોમાં ય સાચવતી પુરાણી વાત ઊભી છે.

ફળીનો હીંચકો ખાલી, છતાં ઝૂલ્યા કરે ધીમે,
હવામાં બાપુજીની એ જ જૂની ભાત ઊભી છે.

નથી બા, તોય ઘંટીનો સુણું છું રોજ પડઘો હું,
રસોડે બા તણી ઝીણી ઉજાગર રાત ઊભી છે.

હવે વેચાય છે આ ઘર, દલાલો ભાવ બોલે છે,
છતાં ઉંબર ઉપર મારી નમેલી જાત ઊભી છે.

પરાગે મન મનાવ્યું કે ભલે વેચાય ઈંટો સૌ,
ન વેચાશે સ્મરણની જે અહીં સોગાત ઊભી છે.

– પરાગ રતનપરા

#ગઝલ #બાપીકુંઘર #સ્મરણ #પિતા #માતા #પરાગરતનપરા
#GujaratiGhazal #AncestralHome #Memories #Parents #Heritage #ParagRatanpara