લાઇબ્રેરીનું પુસ્તક

લાઇબ્રેરીમાંથી
એક જૂનું પુસ્તક લાવ્યો.

પાનાં પીળાં,
ખૂણા વળેલા,
ને એક પંક્તિ નીચે
પેન્સિલથી ખેંચેલી
ઝીણી લીટી:
‘પ્રેમ કદી પાછો નથી માગતો.’

હાંસિયામાં
કોઈ અજાણ્યા હાથે લખ્યું હતું:
‘ખોટું.’

ને એની નીચે,
બીજા કોઈ હાથે,
બીજી શાહીમાં:
‘સાચું. મેં જોયું છે.’

હું આખી રાત
એ બે અજાણ્યા વાચકો વચ્ચે
બેસી રહ્યો —
જાણે બે ભાંગેલાં હૃદય
એક પાન પર
હજી ઝઘડતાં હોય.

સવારે મેં પણ
પેન્સિલ ઉપાડી,
ને ધીમેથી લખ્યું:
‘બંને સાચા છો.’

પુસ્તક પાછું આપ્યું,
પણ પેલું પાનું
મારી અંદર
વળેલું જ રહી ગયું.

– પરાગ રતનપરા