કોણ છે તું?

વહેલી સવારે
અરીસામાં એક માણસ ઊભો છે.

વાળમાં ચૂનો,
આંખ નીચે બે નાની થેલીઓ,
ને હોઠ પર એવું સ્મિત
જે ક્યાંક
લોન-ઑફિસમાં શીખ્યું હોય.

હું પૂછું છું: ‘કોણ છે તું?’

એ કહે છે:
‘તેં જેટલા રસ્તા પાછળ છોડ્યા,
એ બધા
હવે બંધ થઈ ગયા છે.
જે છોકરો
નદીકાંઠે કવિતા લખતો,
ગિટાર શીખવા માગતો,
પહાડ ચડવા માગતો —
એ મને
તારી ચાવી આપીને
ગયો.’

હું ચાવી શોધું છું.
ખિસ્સામાં
માત્ર
ઑફિસના ડ્રૉઅરની
એક ચાવી છે.

– પરાગ રતનપરા