કાના સાથે નહીં રમું

નહીં રમું રે સૈયર, કાના સાથે નહીં રમું,
દાવ દઈને ભાગી જાતો, એવા સંગે શું ઘૂમું?

આંખમિચોલી રમતાં રમતાં આંખો મારી મીંચાવે,
ને પાછળથી ચોટલો ખેંચી, વાંસલડી વગડાવે;
પકડું તો એ પવન બની જાય, શોધું તો ના મળું…
નહીં રમું રે સૈયર…

ગિલ્લીદંડે મટુકી ફોડે, દોષ ગાયોને દેતો,
રાસ રમે તો હજાર રૂપે, હું તો એક જ રહેતો;
સો સખીઓની વચ્ચે મારે ભાગે સૂનું સૂનું…
નહીં રમું રે સૈયર…

પરાગ કહે: આ રીસ અધૂરી, એ બંસી જ્યાં વાગે,
ગોપી સૌ સોગંદ ભૂલીને દોડે આગે આગે;
‘નહીં રમું’ કહેનારી રાધા પહેલી દોડે, હું ય ઝૂમું…
નહીં રમું રે સૈયર…

– પરાગ રતનપરા