હસીને

દરદ ભાર સૌ મેં ઉઠાવ્યા હસીને,
ઘણા ઘાવ દિલમાં છુપાવ્યા હસીને.

હતો ગામ ઝૂલો, હતો ગામ મેળો,
વિદેશે ગયો, સૌ ગુમાવ્યા હસીને.

ન સમજે, ન ચાહે, ન પૂછે ખબર જે,
છતાં તોય નાતા નિભાવ્યા હસીને.

દગો દઈ ગયા જે સગાં ને સહોદર,
બધા એ ગુના મેં ભુલાવ્યા હસીને.

પરાગે પડેલાં બધાં ફૂલ વીણી,
ફરી હાર એના સજાવ્યા હસીને.

– પરાગ રતનપરા

#ગઝલ #સ્મિત #સહનશીલતા #ક્ષમા #જીવન #પરાગરતનપરા
#GujaratiGhazal #SmileThroughPain #Forgiveness #Resilience #Life #ParagRatanpara