ગુજરાતી તો એ

ગુજરાતી તો એ, જે ઢોકળાં ખાય ને દુનિયા ખૂંદી આવે,
ગુજરાતી તો એ, જે નફો ગણે ને નરસિંહ પણ ગાવે.

ન્યૂયોર્કમાં મોટેલ ચલાવે, લંડનમાં દુકાન,
પણ દિવાળીએ ફોન કરીને પૂછે: ‘બા, કેમ છે ગામ?’
ડૉલર ગણતાં ગણતાં ય એ ગરબો ગાતો જાવે…
ગુજરાતી તો એ…

ભાવ પૂછે સો વાર, ને પછી દાન કરે દિલ ખોલી,
ઝઘડે નાની વાતે, ને ભેટે મીઠું બોલી;
‘કેમ છો?’માં આખું ઘર ને આખું ગામ સમાવે…
ગુજરાતી તો એ…

પરાગ કહે: જે ગાંધી, સરદાર ને મેઘાણી વાંચે,
ને પોતાની ભાષા બોલતાં જરી ય ના શરમાવે;
એ જ સાચો ગુજરાતી, જે ગુજરાત ઘરે ઘરે લાવે…
ગુજરાતી તો એ…

– પરાગ રતનપરા