ફેરિયો

વીસ વર્ષથી
હું આ જ ચાર રસ્તે
ગજરા વેચું છું.

આ શહેરે
મારી પાસેથી
હજારો ગજરા ખરીદ્યા છે —
પહેલી મુલાકાતો માટે,
લગ્નની વર્ષગાંઠ માટે,
રિસાયેલી પત્નીઓ માટે,
ને થોડાક
સ્મશાનના રસ્તે.

પણ
આ શહેર
મને ઓળખતું નથી.

સિગ્નલ લાલ થાય
ત્યારે કાચ નીચે ઊતરે છે,
લીલો થાય
ત્યારે હું
ફરી
રસ્તાનો ભાગ બની જાઉં છું.

હું જાઉં તો
કોઈ નહીં પૂછે.

હા,
ચાર રસ્તાના થાંભલા પાસે
થોડા દિવસ
મોગરાની ગંધ
મારી રાહ જોશે.

– પરાગ રતનપરા