એક વાર ‘હા’

એક વાર તું ‘હા’ કહી દે, તો ચાંદો ઊતરે આંગણે,
તારલિયાની ઓઢણી ઓઢી હું નાચું રે પાંપણે.

તારી ‘ના’માં પણ છુપાયો ‘હા’નો મીઠો રણકો,
હોઠ ભલે ને ના પાડે, આંખોમાં હેતનો ટહુકો;
શરમની દીવાલ ઠેકી દે, તો ફૂલડાં ખીલે બારણે…
એક વાર તું ‘હા’ કહી દે…

મા પૂછે છે: ‘કોણ છે એ?’ ને બાપુ મૂછ મરોડે,
બહેની કરતી મશ્કરી, ને ભાઈ ગુસ્સે દોડે;
તું ‘હા’ કહે તો હું સૌ સામે ઊભો રહું રણમેદાને…
એક વાર તું ‘હા’ કહી દે…

પરાગ કહે: એક ‘હા’માં આખો ભવ સમાય,
એક ‘હા’ના અક્ષર બે, ને જનમ જનમ લંબાય;
કહી દે, ગોરી, કહી દે, પછી મળીએ ફેરાને ટાણે…
એક વાર તું ‘હા’ કહી દે…

– પરાગ રતનપરા