એક જ

એક જ જિંદગી છે,
એણે કહ્યું,
‘તો બધું જ જોઈ લેવું છે —
પેરિસ, પહાડ, પિરામિડ,
દરિયા નીચેની માછલીઓ,
ને ધ્રુવ પરનો બરફ.’

એક જ જિંદગી છે,
મારી બાએ કહ્યું હતું,
‘તો એક જ જણને
પૂરેપૂરો જોઈ લેજે —
એની આંખના ખૂણાની કરચલી,
એના અવાજની થાક,
એની ચુપકીદીનો રંગ.’

હું ઘણું ફર્યો.
ઘણું જોયું.

પણ આજે
પત્નીના વાળમાં
પહેલો સફેદ તાર દેખાયો,
ત્યારે સમજાયું —
બાના પેરિસ, પહાડ ને પિરામિડ
બધાં
એક જ ચહેરામાં હતાં.

– પરાગ રતનપરા