ડબ્બામાં

લટકતા સૌ, દબાતા સૌ, ગણાતા શ્વાસ ડબ્બામાં,
ઘણા અડકે, ઘણા ઘસતા, નથી કો પાસ ડબ્બામાં.

સવારે ને પછી સાંજે, ઘડી ગણતાં જતું જીવન,
અહીં અડધી વિતાવી, રોજના આ ત્રાસ ડબ્બામાં.

અજાણ્યો હાથ ખેંચીને ચડાવી દે મને દોડી,
ન પૂછે નામ કે નાતો, અજબ વિશ્વાસ ડબ્બામાં.

કદી ખોળે હસે નાનું, ઘડીભર સૌ હસે સાથે,
પછી ખીલે સુગંધીલો મધુર એ હાસ ડબ્બામાં.

પરાગે મોગરાના ફૂલની વેણી ખરીદી ત્યાં,
તરત એ ભીડમાં ફેલાઈ મીઠી વાસ ડબ્બામાં.

– પરાગ રતનપરા

#ગઝલ #લોકલટ્રેન #ભીડ #શહેરીજીવન #એકલતા #પરાગરતનપરા
#GujaratiGhazal #LocalTrain #CrowdedLonely #CityCommute #SmallJoys #ParagRatanpara