છૂટે નહીં

તાપ છે, તોફાન છે, પણ છાંયડો છૂટે નહીં,
ભીંત તૂટી, છત ટપકતી, ઓરડો છૂટે નહીં.

સાંજ પડતાં રોજ જાઉં, કોઈ મળતું પણ નથી,
તોય પેલો પાર્કનો એ બાંકડો છૂટે નહીં.

આંખ મીંચી, શ્વાસ ગણતો, ધ્યાનમાં બેઠો, છતાં
ડાળ ડાળે કૂદતો મન-માંકડો છૂટે નહીં.

લાખ સમજાવ્યો મને સૌ સજ્જનોએ, તો ય આ
કૂતરાની પૂંછડી શો વાંકડો છૂટે નહીં.

જિંદગીભર હાઈવે પર દોડતો આવ્યો, ‘પરાગ’,
એક રસ્તો ગામનો એ સાંકડો છૂટે નહીં.

– પરાગ રતનપરા

#ગઝલ #માયા #વળગણ #જીવન #ગામડું #પરાગરતનપરા
#GujaratiGhazal #Attachments #LifesBonds #RestlessMind #Village #ParagRatanpara