ચલાવ્યું

નહોતું કશું, બસ નમકથી ચલાવ્યું,
દિવાળી, નયનની ચમકથી ચલાવ્યું.

ટપકતું હતું છાપરું ચોતરફથી,
અમે ધૂનની એ ખનકથી ચલાવ્યું.

કહે મા: ‘મને ભૂખ લાગી નથી, લે’,
અને પેટ એણે મલકથી ચલાવ્યું.

ઘરે વીજળી ક્યાં હતી વાંચવાને?
ગલી-થાંભલાની ઝબકથી ચલાવ્યું.

પરાગે ન માગ્યું કશું જિંદગીથી,
ગઝલના ગળાની હલકથી ચલાવ્યું.

– પરાગ રતનપરા

#ગઝલ #ગરીબી #મા #સંઘર્ષ #સંતોષ #પરાગરતનપરા
#GujaratiGhazal #Poverty #MothersSacrifice #Struggle #Contentment #ParagRatanpara