ભીંત

ઓરડા મોટા ઘણા ને ચોતરફ બસ ભીંત છે,
બાળકોની ચીસ ક્યાં? ક્યાં ઘોડિયાનું ગીત છે?

સાંજના ભેગા મળે સૌ, હાથમાં લઈ ફોનને,
એક થાળી, ચાર સ્ક્રીનો: આધુનિક આ રીત છે!

બાપ ઓફિસથી વળે ત્યાં ઊંઘતાં સૌ છોકરાં,
જીત પૈસાની બધે, પણ ક્યાંય ઘરની જીત છે?

ગોદડી બાની હતી, ને હૂંફ એની ઘર હતી,
હીટરો છે, તાપ છે, પણ ભીતરે આ શીત છે.

આ પરાગે ભીંતને પૂછ્યું: તને શું જોઈએ?
ભીંત બોલી: હાથ પકડે એ જ સાચી પ્રીત છે.

– પરાગ રતનપરા

#ગઝલ #ઘર #પરિવાર #આધુનિકતા #હૂંફ #પરાગરતનપરા
#GujaratiGhazal #HomeVsHouse #Family #ModernLife #Warmth #ParagRatanpara