ભયશૂન્ય

‘જ્યાં ચિત્ત ભયશૂન્ય હોય…’

માસ્તર
વર્ગમાં ભણાવે છે.

છોકરો પૂછે છે:
‘સાહેબ,
એ દેશ ક્યાં છે?’

માસ્તર
બારી બહાર જુએ છે —
રસ્તા પર
પોલીસનો દંડો,
સ્ક્રીન પર
ટ્રોલનું ટોળું,
ઑફિસમાં
બોસની ભ્રમર,
ઘરમાં
પાડોશીની નજર.

માસ્તર
ચશ્માં સાફ કરે છે,
પછી ધીમેથી કહે છે:
‘બેટા,
એ દેશ
કવિતામાં છે.
પરીક્ષામાં
પૂછાશે,
જીવનમાં
નહીં.’

ઘંટ વાગે છે.
છોકરો
પાઠ ગોખવા માંડે છે,
ને માસ્તર
પહેલી વાર
એ પાઠ
મનમાં
પ્રાર્થનાની જેમ બોલે છે.

– પરાગ રતનપરા