બે શબ્દ

‘ચા મૂકું?’
‘હા.’
‘ખાંડ ઓછી?’
‘તું જાણે છે.’

પચાસ વર્ષથી
અમારી વાતો
આટલી જ લાંબી છે.

જુવાનીમાં
અમે આખી રાત વાતો કરતાં,
ને છતાં
એકબીજાને સમજતાં નહોતાં.

હવે
બે શબ્દોમાં
આખો દિવસ કહેવાઈ જાય છે.

ક્યારેક એ પૂછે છે:
‘તને ખબર છે, આજે કઈ તારીખ છે?’

મને ખબર નથી હોતી.
પણ હું કહું છું:
‘તું છે ત્યાં સુધી
કોઈ તારીખની જરૂર નથી.’

એ ‘ગાંડા!’ કહીને
રસોડામાં જાય છે,
ને ચામાં
એ દિવસે
ખાંડ થોડી વધારે નાખે છે.

– પરાગ રતનપરા