બદલાય છે

રોજ આ સંસારમાં હરપળ હવા બદલાય છે,
ને પલકમાં રાજવીની પણ દશા બદલાય છે.

બંધ થઈને રેશમી ઘરમાં ઘણું તપ કીટનું,
પાંખ ફૂટી, રંગ ફૂટ્યા, ને કથા બદલાય છે.

કાલ જે ‘ભારત બચાવો’ ગાઈ ઝંડો ઝાલતા,
રોજ ખુરશી કાજ નેતાની વફા બદલાય છે.

એ જ ભીંતો, એ જ બારી, એ જ ઉંબર, તે છતાં
એ જતાં તો ઓરડાની પણ દિશા બદલાય છે.

ફૂલ ખરશે, બીજ બનશે, ખીલશે પાછું, ‘પરાગ’,
આંખ બદલો, તો મરણની પણ વ્યથા બદલાય છે.

– પરાગ રતનપરા

#ગઝલ #પરિવર્તન #કાયાપલટ #પતંગિયું #દૃષ્ટિ #પરાગરતનપરા
#GujaratiGhazal #Change #Transformation #Butterfly #Perspective #ParagRatanpara