અંધાર પૂછે છે

બુઝાયા કેમ દીવા સૌ? હવે અંધાર પૂછે છે,
હવા ક્યાં નીકળી ગઈ એ? ઉઘાડું દ્વાર પૂછે છે.

સજાવી રાતની ચાદર, પવન ચાલ્યો ગયો છાનો,
ધુમાડો વાટનો થઈને, ઘણો લાચાર પૂછે છે.

ઝગે છે રોશની ઊંચે, તળેટી રાત કાળી છે,
ગયું ક્યાં કોડિયું આખું? હવે સરકાર પૂછે છે.

તને બે હાથથી ઢાંકી, ચલાવ્યો રાતભર રસ્તો,
છતાં કાં તું ઠરી ગઈ? એ હૃદયનો પ્યાર પૂછે છે.

પરાગે એક દીવો ભીતરે રાખ્યો હતો બળતો,
પવન ખુદ એ જ દીવાનો હવે આધાર પૂછે છે.

– પરાગ રતનપરા

#ગઝલ #દીવો #અંધારું #પવન #આશા #પરાગરતનપરા
#GujaratiGhazal #LampAndWind #Darkness #InnerLight #Resilience #ParagRatanpara