અડીખમ

હજી સામસામે કિનારો અડીખમ,
તમારો, અમારો ઠઠારો અડીખમ.

વચોવચ નદી જિંદગીની વહી ગઈ,
છતાં મૌનનો આ ઇશારો અડીખમ.

ઘણા પત્ર લખ્યા, ન બીડ્યા કદીયે,
અહમ્‌નો હતો એ સહારો અડીખમ.

તમે જાગતાં રાતભર એકલાં, ને
અમે પણ, હૃદયનો તિખારો અડીખમ.

પરાગે ભલે ફૂલ ખરતાં જ જોયાં,
પવન સાથનો આ પનારો અડીખમ.

– પરાગ રતનપરા

#ગઝલ #અહમ્ #પ્રેમ #રિસામણાં #અંતર #પરાગરતનપરા
#GujaratiGhazal #Ego #LoveAndPride #Separation #TwoShores #ParagRatanpara