આરસની પરી

મ્યુઝિયમના ત્રીજા ઓરડામાં
આરસની એક પરી ઊભી છે —
પાંખો ખુલ્લી,
એક પગ હવામાં,
જાણે હમણાં જ ઊડી જશે.

લોકો આવે છે,
ફોટા પાડે છે,
‘વાહ!’ કહે છે,
ને આગળ વધી જાય છે.

ખૂણામાં સ્ટૂલ પર
એક ચોકીદાર બેઠો છે —
ત્રીસ વર્ષથી.
ખભા ઝૂકેલા,
એક પગ સહેજ લંગડાતો.

પરી બસો વર્ષથી ઊભી છે,
એટલે એ કલા છે.
ચોકીદાર ત્રીસ વર્ષથી બેઠો છે,
એટલે એ નોકરી છે.

સાંજે બત્તીઓ બુઝાય ત્યારે
હું વિચારું છું —
બેમાંથી
ખરેખર ઊડવા માગે છે
એ કોણ હશે?

– પરાગ રતનપરા