વસંત આવી

આવી વસંત મારે આંગણે આવી,
કેસૂડે રંગી ને કોયલે ગાઈ, વસંત મારે આંગણે આવી.

આંબાની ડાળે મ્હોર મલક્યો ને ભમરાએ છેડ્યો રે સૂર,
સરસવનાં ખેતર પીળાં પીળાં, જાણે ઢોળાયું સોનાનું પૂર;
ઝાંખરાં ને ઝાડવાંને પાંદડે પાંદડે નવલી તે ચૂંદડી લાવી…
આવી વસંત…

ગામને પાદર ફાગ ગવાય ને ઢોલે ઢબૂકે રે રાત,
સાજનની આંખે ગુલાલ ઊડે ને હૈયે ન સમાતી વાત;
મનડું મારું તો પતંગિયું થઈને ફૂલડે ફૂલડે ભાવી…
આવી વસંત…

પરાગ કહે: આ વસંત નથી રે કેવળ ફૂલોનો મેળો,
સૂકી ડાળને ફરી ફૂટવાનો આ તો કુદરતનો ખેલો;
પાનખર વેઠી જે ઊભા રહ્યા, એને વસંતે વધાવી…
આવી વસંત…

– પરાગ રતનપરા