વાડીએ વાટ

ટેમ મળે તો આંટો મારજે, ઝમકુ, વાડીએ જોઉં વાટ,
મોલ ઊભા છે લીલા લીલા, ને ભીનો કૂવાનો ઘાટ.

કપાસનાં ફૂલ ખીલ્યાં છે, જાણે તારું સ્મિત,
રાતે ચોકી કરું ત્યાં ગાઉં તારું જ એક ગીત;
ખાટલે બેઠો ગણું તારા, ને નિંદર ઊડે ઝટ —
ટેમ મળે તો આંટો…

ભાતું લઈને આવજે, ઝમકુ, રોટલો ને મરચું,
તારા હાથનું ખાઉં તો લાગે, ખેતર આખું જરચું;
વાડે બેઠી કોયલ પૂછે: ‘આવશે કે નહીં આજ?’ —
ટેમ મળે તો આંટો…

પરાગ કહે: આ ખેતર-શેઢે પ્રીતનો પાક પાકે,
ના બંગલા, ના મોટર, તોય હૈયાં ના થાકે;
ઝમકુ આવી ભાતું લઈ, ને ખીલી ઊઠી આખી પાટ —
ટેમ મળે તો આંટો…

– પરાગ રતનપરા