તેં શું કર્યું?

દેશ તો આઝાદ થયો પંચોતેર વરસ પહેલાં,
તેં શું કર્યું, ભાઈ? તેં શું કર્યું?

ઝંડો લહેરાવ્યો તેં ‘સ્ટેટસ’ ઉપર,
દેશભક્તિ ગાઈ તેં ‘રીલ્સ’ના સૂર પર;
રસ્તે પડેલો કચરો જોઈ મોં ફેરવ્યું,
ને ‘સ્વચ્છ ભારત’નું પોસ્ટર શેર કર્યું;
ટ્રાફિકની લાઇન તોડી, બોલ્યો ‘જય હિંદ!’
તેં શું કર્યું, ભાઈ? તેં શું કર્યું?

ચૂંટણીના દિવસે રજા માણી દરિયે,
ને પછી નેતાને ગાળો દીધી ઓટલિયે;
ટેક્સ બચાવવાના સો રસ્તા શોધ્યા,
ને સરકારી રસ્તાના ખાડા ગણી ગોખ્યા;
બધાનો વાંક કાઢ્યો, પોતાનો ન દીઠો,
તેં શું કર્યું, ભાઈ? તેં શું કર્યું?

પરાગ કહે, આઝાદી કોઈ ભેટ નથી,
રોજ રોજ જીવવાની છે એ રીત;
એક ઝાડ વાવ, એક બાળક ભણાવ,
એક સાચો મત, ને એક સાચી પ્રીત;
પછી ગાજે ગગનમાં તિરંગો ગર્વે,
તેં આ કર્યું, ભાઈ! તેં આ કર્યું!

– પરાગ રતનપરા