તે પણ સમય

ઘાવ પર હળવે મલમ જે ચોપડે, તે પણ સમય,
ને પછી એ ઘાવ પર ઠોકર જડે, તે પણ સમય.

ઢીંગલી લઈ જે રમી'તી, આજ એ છે સાસરે,
બાપ જે ઉંબર ઉપર છાનો રડે, તે પણ સમય.

કાલ જે સિંહાસને બેઠા હતા અભિમાનમાં,
આજ એના પાળિયા ગામે પડે, તે પણ સમય.

રેતની શીશી ઉલટનારો કદી દેખાય ના,
તોય કણ કણ જે અહીં નીચે પડે, તે પણ સમય.

આ ‘પરાગે’ જે લખેલું, કાળ ભૂંસી નાખશે,
ને છતાં જે ગીત હોઠે જઈ ચડે, તે પણ સમય.

– પરાગ રતનપરા

#ગઝલ #સમય #કાળ #દીકરીનીવિદાય #અભિમાન #પરાગરતનપરા
#GujaratiGhazal #Time #PassageOfTime #Impermanence #FatherDaughter #ParagRatanpara