તને શોધું

નયન મીંચી, હૃદય ખોલી, દિશાઓમાં તને શોધું,
હવે મંદિર નથી જાતો, દુઆઓમાં તને શોધું.

હતું ફળિયું, હતો વડલો, હતું બચપણ, હતા આપણ,
હજી એ વડ તણી ઝૂકી ઘટાઓમાં તને શોધું.

હતી મા, ને હતી વાર્તા, ભરેલી રાતની ગોદે,
હવે બસ યાદની ઝાંખી કથાઓમાં તને શોધું.

કહે તું, ‘હું જ સેવક છું’, મળે ના કેમ શેરીએ?
હવે પડદે, હવે મંચે, સભાઓમાં તને શોધું.

પરાગે મ્હેક થઈ જાણ્યું, વસે તું શ્વાસમાં, તો પણ
નકામો હું હિમાલયની ગુફાઓમાં તને શોધું.

– પરાગ રતનપરા

#ગઝલ #શોધ #આધ્યાત્મ #બાળપણ #વ્યંગ #પરાગરતનપરા
#GujaratiGhazal #Seeking #InnerDivine #Childhood #Satire #ParagRatanpara