તળ સુધી

કોણ પ્હોંચે અહીં શ્વાસના તળ સુધી?
રણ મહીં ઝૂરતી પ્યાસના તળ સુધી.

ઝાકળે રાત આખી વિતાવી, પછી
સૂર્ય પ્હોંચ્યો નહીં ઘાસના તળ સુધી.

રાધિકા ઘૂમતી, વાંસળી વાગતી,
કોઈ પ્હોંચ્યું ન એ રાસના તળ સુધી.

થઈ ગયો સંત, ત્યાગી, તપસ્વી, છતાં
ના ગયો એ કદી વાસના તળ સુધી.

આ પરાગે લખી સો ગઝલ, તોય પણ
ક્યાં ગયો હું ય વિશ્વાસના તળ સુધી?

– પરાગ રતનપરા

#ગઝલ #ઊંડાણ #તરસ #વૈરાગ્ય #શ્રદ્ધા #પરાગરતનપરા
#GujaratiGhazal #Depth #InnerThirst #Renunciation #Faith #ParagRatanpara