તાપમાં

બંધ પેટીના બધા પત્રો સુકાયાં તાપમાં,
ને અમે પણ એ સ્મરણ સાથે છવાયાં તાપમાં.

પાપડો ને ખીચિયાં બા પાથરે ધાબા ઉપર,
ને ઉડાડી કાગડા, બાળો ભુલાયાં તાપમાં.

શાલ દાદાની ફરીથી હૂંફ લેવા નીકળી,
ઊનનો હર તાંતણો જાણે નહાયાં તાપમાં.

એક ખેડૂ ભરબપોરે હળ ચલાવે ખેતરે,
તોય એનાં સ્વપ્ન લીલાં ના બળાયાં તાપમાં.

આ ‘પરાગે’ ફૂલ પેઠે સૂર્ય ઝીલ્યો હોંશથી,
મ્હેકનાં ગીતો ય એથી તો ગવાયાં તાપમાં.

– પરાગ રતનપરા

#ગઝલ #તડકો #બાળપણ #અગાશી #સ્મરણ #પરાગરતનપરા
#GujaratiGhazal #Sunshine #ChildhoodSummers #OldLetters #Memories #ParagRatanpara