સ્વપ્નમાં

તું ન આવે જાગતાં, તો રોજ આવે સ્વપ્નમાં,
રાતભર મીઠી સજા થઈને જગાવે સ્વપ્નમાં.

હાથ ઝાલી બાળપણના ગામમાં લઈ જાય તું,
ને મને ચકડોળમાં પાછી ઝુલાવે સ્વપ્નમાં.

જાગતાં તો રૂઠનારી, એ જ મારી રાતભર
પાંપણોને પ્રેમથી ખુદ તું મનાવે સ્વપ્નમાં.

ઝૂંપડીમાં ગોદડીની ટાઢ ઠૂંઠવતી રહે,
તું જ મારી આંખમાં સૂરજ વસાવે સ્વપ્નમાં.

આંખ ખૂલે ને ‘પરાગે’ તું વિખૂટી થઈ જશે,
એ જ ડર તો રાતભર મીઠું રડાવે સ્વપ્નમાં.

– પરાગ રતનપરા

#ગઝલ #સપનું #પ્રેમ #પ્રતીક્ષા #રાત #પરાગરતનપરા
#GujaratiGhazal #Dreams #Love #Longing #SleeplessNights #ParagRatanpara