સ્ટેટસ પર

દેશ માટે જાન દેવા સૌ ખડા છે સ્ટેટસ પર,
ક્રાંતિના નારા લગાવી, લ્યો, ધજા છે સ્ટેટસ પર.

રોડ પર ઘાયલ પડેલો કોઈ તરફડતો હતો,
વીડિયો લીધો બધાએ, એ દયા છે સ્ટેટસ પર.

બાપ ઘરડાઘર ગયો ને ફોન પણ જાતો નથી,
બાપ-દિનની આરતી ને વંદના છે સ્ટેટસ પર.

ઝાડ કાપી ફ્લેટ બાંધ્યા, શ્વાસ રૂંધાયા બધે,
‘વૃક્ષ વાવો’ની સલાહો ને હવા છે સ્ટેટસ પર.

આ પરાગે પણ લખી છે દેશ માટે એક ગઝલ,
ને ગણું છું રાતભર કે વાહવા છે સ્ટેટસ પર.

– પરાગ રતનપરા

#ગઝલ #વ્યંગ #દેખાડો #સોશિયલમીડિયા #દેશપ્રેમ #પરાગરતનપરા
#GujaratiGhazal #Satire #SocialMediaPatriotism #Hypocrisy #StatusCulture #ParagRatanpara