શોધું તને

હું પરોઢે ઝાકળે, આ ભોરમાં શોધું તને,
રાતભર ઘોંઘાટ, ભીડે, શોરમાં શોધું તને.

વાદળો ઘેરાય ત્યારે, ગાજતાં આકાશમાં
ટહુકતા એ આંગણાના મોરમાં શોધું તને.

આભમાં કાપ્યા પતંગો સૌ, છતાં એ હાથમાં
આંગળીએ કાપ પાડે, દોરમાં શોધું તને.

બા ગયાં, પણ સાચવી સાડી હજી પેટી મહીં,
આંસુથી ભીની થયેલી કોરમાં શોધું તને.

આ પરાગે બાગ છોડી વાયરા સાથે ફરી,
આ પવનના વેગમાં, આ જોરમાં શોધું તને.

– પરાગ રતનપરા

#ગઝલ #શોધ #વિરહ #મા #સ્મરણ #પરાગરતનપરા
#GujaratiGhazal #Searching #Absence #Longing #Remembrance #ParagRatanpara