રાધાનું ઝાંઝર

ઝાંઝર મારું ઝમક્યું ને આખું ગોકુળ જાગ્યું રે,
કાનો કહે છે, ‘ચાલ જમુના’, મને તો વસમું લાગ્યું રે.

છાની માની પગલી માંડું, રેતી ગાતી ગીત,
ઘૂઘરીએ ઘૂઘરીએ બોલે મારી છાની પ્રીત;
સાસુ જાગી, નણદી જાગી, મેં તો મૌન જ માગ્યું રે…
ઝાંઝર મારું ઝમક્યું…

કાઢી ઝાંઝર ખોસ્યું મેં તો ઓઢણીને છેડે,
તોય ધબકતું હૈયું બોલે, કોણ હવે એને ખેડે?
ઝાંઝર ચૂપ ને હૈયું બોલે, આ તો મેં શું તાગ્યું રે…
ઝાંઝર મારું ઝમક્યું…

પરાગ કહે: આ પ્રીતનો રણકો કોઈ ધાતુ નહિ,
ઝાંઝર કાઢો, હૈયું કાઢો, રણકે તોય અહીં;
રાધાના રુદિયામાં વાગે, એ સૂર ક્યાંથી ભાગ્યું રે?
ઝાંઝર મારું ઝમક્યું…

– પરાગ રતનપરા