પૂરમાં

ઘર ગયું, ખેત ગ્યું, ગામડું પૂરમાં,
કોઈની ખાટલી, ઝૂંપડું પૂરમાં.

હાશ, સૌ જીવતાં, ઘર ભલે ને ગયું,
બાળ રોયું: ‘ગયું ચોપડું પૂરમાં.’

ગાય ખીલે રહી, આંખ ભીની કરી,
દોર તૂટ્યો, ગયું વાછડું પૂરમાં.

એક કીડી બચી, કારણે એટલું:
નાવ થઈ ગ્યું હતું પાંદડું પૂરમાં.

બાગ ના, ફૂલ ના, પણ પરાગે જુઓ,
શબ્દનું બાંધતો ખોરડું પૂરમાં.

– પરાગ રતનપરા

#ગઝલ #પૂર #હોનારત #ગામડું #આશા #પરાગરતનપરા
#GujaratiGhazal #Flood #Disaster #VillageLife #Hope #ParagRatanpara