પી ગયો

એક ઘૂંટે હું અધૂરી જિંદગીને પી ગયો,
ચાંદ ઢળતી રાતની એ ચાંદનીને પી ગયો.

‘ભૂલજે મુજને’ લખેલો પત્ર વાંચીને, પછી
આંખમાં જે ઊમટી’તી, એ નદીને પી ગયો.

જામ લઈ ઊભો હતો, મેં શિર નમાવ્યું’તું જરા,
એ ક્ષણે મેં જામ સાથે બંદગીને પી ગયો.

ખેડુએ આકાશ સામે આંખ માંડી, ને જુઓ,
તાપ એવો કે પવન આ વાદળીને પી ગયો.

ફૂલ તોડી સૌ ગયા, ને એકલો બેઠો ‘પરાગ’,
રાત આખી ઓસ ભીની પાંખડીને પી ગયો.

– પરાગ રતનપરા

#ગઝલ #ઘૂંટ #વિરહ #સૂફી #તરસ #પરાગરતનપરા
#GujaratiGhazal #OneSip #Heartbreak #SufiMood #Thirst #ParagRatanpara